چاکرے اوبادَگ
پَتو ماتیں وتن نوں من سرگِپتگاں
پہ تئی آجُوئی مرگ ءَ سرگْوستگاں
مَکر مُلّاے وھدے کہ شَر زانتَگاں
نی گُلامی ءِ زمزیلّ من سِستگاں
دیریں بَندیگ ءُ دِگرے نَپَر بوتگاں
گْرانیں واب ءَ چِہ نوکی ماں پادَتگاں
جَوریں جَورے سر ءَ بینَگ ءَ بستَگ اَت
راج ءَ رَدوا کہ آ بینَگ اِش وارتگ اَت
شال مانپوش اِتگ واجکار ءَ پہ وت
برھنَگیں راج گوں مُلّا نہ اِنت گیش وت
جُھد پہ سرڈگار ءَ اِبابَت منی
کُل بلوچ ءِ تِپاکی اِنت ھاجَت منی
آجُوے رُژن کَندیل ءَ زیارت کناں
یا چو بالْو سُچاں یا پہ رُژن ءَ رَساں
چہ منی سَرڈگار ءَ نہ روپ اِت نوں باج
باج اَسکندر ءَ ھِچ نہ بُرتگ گوں تاج
نہ من پُرشتگیں داریوشاں ءُ نہ کورُشاں
چاکرے پُسّگاں شیریں، لَشکَر کُشاں
آجُوے بُرتگیں بند ءَ بنداں نوں من
وژدِلی گوں وتی راج ءَ نِنداں نوں من
ھُشک ءُ تَبدانی رَند ءَ بھارے ھَم ھَست
کِشتگیں دان توم ءَ کِشارے ھَم ھَست
کَوش شیزار اِیت بندانی آپ سارت بَنت
تُنّی ایں درچک نوش اَنت ءُ آبات بَنت
تیوگیں پَنتے داتگ من ءَ پیرُک ءَ
آ پہ راج ءَ نہ بیت تئی نہ بیت تیوک ءَ
شھدیں اَلھان وان اَنت پہ ھانُل کُلی
آسُمی پُلّ ءِ آتار مئے ھوش ءَ پُلی
شائراں جاہ جَتگ پَہ وتی ھانُل ءَ
چوں کُلی بوتگ اَنت پَہ وتی آ گُل ءَ
نَد کہ جُنز اِیت ءُ دِل گالاں کتار کَنت
گال ءُ گُپتار دِل ءِ زَیم تئی یاتگار بَنت
زَیم بلوچ
