پُرّدردیں بِچکَند

بُلبُلے کہ  اَرس ریچ اِیت  واھَگ  ءُ  اَرمان بات
باگی ءَ  کہ  پُلّ دردیگ اَنت  آ  باگ بیران بات

 

آ  بھار ءَ  کہ گُلّاں  تاھِیر ءُ ھِچ اَرزشت نیست
بُنگرات  آدْرو  بہ  بات  پہ  مِہتراں  تاوان بات

 

بے بھاھیں زندگی ءَ  ھِچ  بھا نیست اِنت اِد ءَ
گْران بھاھیں مہر  ءُ  واھَگ پہ شُما اَرزان بات

 

آہ  ءُ  اُپّاراں منی  کہ اَرش ءِ  واھُندوں گُڑیت
اِے منی پُرّدردیں  اُپّار  کوہیں  دِلاں دِران بات

 

آہ کہ بے چاڑ اَنت دیدگ  چو اَبیتکیں میتگ ءَ
تئی  اَبیتکیں  دیدگ ءِ تیر سینگاں سُمبان بات

 

پہ  وتی  ماتیں  ڈگار ءَ  جَنّت ءَ  ھیرات  کنَت
ھُور  ءُ  گِلمان  مکھّیں  مات ءِ سرا کُربان بات

 

اَندوھانی  آس  پتّو  واجھاں  وت  روک کُتگ
تئی گَم ءِ آچِش  ھَلک ءِ  واجھاں سوچان بات

 

اَچ تئی پُرّدردیں بِچکَندءَ گیدی ءَ دردے گِرات
اَچ تئی  ویرانیں  زِند ءَ  چِہ  جہان ویران بات

 

سکّی  ءُ  سوری نِبشتگ  مئے نَسیب ءَ تو اَگاں
بیا  بِگردین  تالہ ءَ  کہ  دِل  گَل  ءُ  شادان بات

 

اِے بنی آدم مُدام مئے  سینگ ءَ  گْوار اَنت تیر
آزمان ءَ  چِہ ھُدا  وَت  بئیت  منی دیمپان بات

 

نام کشات آ کہ  پہ  راج  ءُ  زُبان ءَ  جُھد کَنت
آئی ئے نام  ءُ  بُلندی  چو  جُلگہیں  آزمان بات

 

دَنز  ءُ  تامورانی  آماچ  ماہ  ءُ  ماھگونگ منی
ھانُل ءِ گوناپ بہ دْرپشات ماہ پدا جوھان بات

 

تلوساں  پہ  مِسکیں  مَلگورانی بوہ ءَ  تلوساں
چہ اَمُل یاتاں مِسکیں مَلگورانی  بو تالان بات

 

من گوں گالاں  درد جی جان کُرتگ ءُ نازیتگاں
زَیم  تئی پِربستگیں  گال  ھر دِل ءِ درمان بات

 

📚دستونک
✍زَیم بلوچ

https://t.me/balochi_Siyaahag