وشیں باریگ
جی ھما مرد ءُ وش ھما باری
گیرت ءِ پاسپان پیشتاں ساری
وت وتی باگ ءُ باگ ءُ باگداری
وت وتی مُلک اَت راج گمواری
ناں درآمد پہ ھاکُمی اِشتگ
وت وتی ڈیھ ءِ درد ءُ گم روپتگ
گوں تِپاکی ءَ دُژمنی نَشتگ
برات گوں برات ءَ وشدلی نِشتگ
گْوھار گوں برات ءَ ھم کدم بوتگ
دُژمن ءِ دیم ءَ پیش کدم بوتگ
نَشتَگ اَنت شیراں تولگ ءُ روباہ
پاسپان ڈیھہ ءِ سُھب داں بیگاہ
وش ءُ آباد اَت مُلک بلوچانی
زندگی وش اَت چاریں روچانی
دور مردانی گوست ءُ شُت باری
آتکگ اَنت مُلا پہ ریا کاری
پیشوک اَنت مُلا آتکگ اَنت واری
گُلزمین یل دات دیم پہ دینداری
ناں وتی مات ءُ گُوھار ءِ پِکراں اَنت
ناں وتی مُلک ءُ راج ءِ پِکراں اَنت
بے دَر اَنت ڈیھہ ءِ بیا بچاں پُسَگ
بے گِس اَنت ماتی گِریشگ ءَ نِشتگ
کَسر ءُ ماڈی آں نِشت ءَ مئے مُلا
دین تئی دُکان مکتب ءُ مُلا
گُلزمین مُلا تئی نہ اِنت دُکان
دین تئی دُکان گُلزمین مئیگیں
رند گوں شئراں گُلزمین نَدریں
گلزمین دین مئے گُلزمین بَدریں
