پایمال ءِ مئے بلوچی گیرت ءُ نام
چی کناں بے نام ءُ نَنگ ءَ زندمان
گیرت ءِ نام پھرہ آں بیران بوتّ
دل بلوچ ءِ سُتک ھم ویران بوتّ
نَنگ گْوھارانی مئے اَرزان بوتّ
برات شرمندگ چَہ گْوھاران
چی کناں بے نام ءُ نَنگ ءَ زندمان
کمبرے پُسَگ چیتوں بدنام بیت
چاکرے بَچ ءَ بِچار بے نام بیت
مئے بلوچ ءِ شِرکنی بے تام بیت
دُژمنوں آسودگ ءُ شادی کنان
چی کناں بے نام ءُ نَنگ ءَ زندمان
راج ءِ زَھگ ءَ بیا بِچار بے اِزتیں
پرچیا ڈیھہ ءَ وتی بے حُرمتیں
راج گوں اسلام نام ءَ بے سریں
گوں نماز ءُ زِگراں مُلا
زِند جان
چی کناں بے نام ءُ نَنگ ءَ زندمان
بے سَما ءُ بے سر ءُ بے گیرت اَنت
گیرت ءَ راج ءِ وتیگا وت پُل اَنت
نام ء نَنگ ءَ دو کِران ءَ باں کَن اَنت
وت وتی راج ءَ کَن اَنت رسوا جھان
چی کناں بے نام ءُ نَنگ ءَ زندمان
دُژمن ءِ واستہ ءَ وتی نُک ءَ بر اَنت
مردُماں چِہ اوٹ مُلا پَچ گِر اَنت
دُژمن ءِ واستہ ءَ اِے مُلا سرگِر اَنت
نُکّ ءُ ٹُرک ءَ پہ وتی راج مِرمِران
چی کناں بے نام ءُ نَنگ ءَ زندمان
بے وسیں زَھگانی واستہ ءَ بے نَپس
ھَو اِے مُلا زر ءُ مال ءِ دوست بَس
میر ءُ سردار دُژمنانی ھم نَپس
اِے لگور ءَ دُژمنانی ساہ ءُ جان
چی کناں بے نام ءُ نَنگ ءَ زندمان
زَھگ پھرہ ءَ گیرتیں کل ءِ بلوچ
زَھگ بلوچستان گیرت ماہ ءُ روچ
دِرتگیں پَشک ءَ بلوچ ءِ بیا بہ دوچ
گیرت ءِ بدواہ آں زَھر ءَ مان شان
چی کناں بے نام ءُ نَنگ ءَ زندمان
ھَک ءُ گیرت ھَر دو راج ءِ بُرتگ ءِ
پیشٗوک ءِ مُلا مَسیت ءَ کَپتگ ءِ
بے توار ءُ بے سَما آں نِشتگ ءِ
بیا بہ کَن راج ءِ گم ءُ درداں بیان
چی کناں بے نام ءُ نَنگ ءَ زندمان
نَنگ کارچ ءِ دَر شُتگ راج ءِ دل ءَ
لَجَ مئے مردانی کَپتگ مُشکل ءَ
جاہ جَنے شیراں تِپاک ءُ ھمدل ءَ
گیرت ءَ راج ءِ بہ رکین چہ رستران
چی کناں بے نام ءُ نَنگ ءَ زندمان
میر ءُ مُلاے اُمیت ءَ نوں مَہ نِند
گوں تِپاکی زُلم ءِ ساد ءَ بیا بہ سِند
بَزگیں گْوھار ءَ وتیگا بیا بہ گِند
رند گوں راج ءِ گماں ھَر روچ مِران
چی کناں بے نام ءُ نَنگ ءَ زندمان
