پہ درآمد ءَ نہ بیت شات

وتی  گُلزمین ءِ   آجو   منی   آرزو ءُ  لوٹ اِنت
پہ درآمد ءَ نہ  بیت  شات کہ بلوچ  باھوٹ اِنت

پہ لُنج ءِ اِے شپ ءَ  ناں کنا  روک اُمیت کَندیل
منی  دل جُشان  چو تیل ءَ منی رُژن  وٹ اِنت

ماں کمبراں  ما  ھَمل  من   چاکراں  ماں بالاچ
منی ڈیھ ءِ  شیریں  پُسّگ ھما نرمزار مَٹ اِنت

کدی  گُلزمین  آجو  من ءَ   گوندوے   بدے دل
منی چم کمان ءُ تیراں کَلم مئے دست لَٹ اِنت

کُج اِنت آ  نصیر گُلخان  کہ بہ  کَنت تِپاک راج ءَ
کہ مئے راج ناتِپاکیں  پَمشک ءَ دست گَٹ اِنت

وتی دُژمناں  گَلاے  وتی  دوست ءَ  دور دارے
ھمیں  چارکتابیں  مُلا   پہ زر کاسگ چَٹ اِنت

دو روچیں  ھِچ نہ  وارتگ   منی  گُلزمین بَچاں
تئ لاپ مُلا سیریں تئ شام گوشت ءُ بَٹ اِنت

مناں دِل گُشیت  بوان ءَ کہ بلوچی من نزان ءَ
منی مادرے  زبان ءِ  پَمن ءَ   چو شیر وٹ اِنت

وتی ڈیھہ  یل مہ داتیں  پہ  اُمیت تو بھشت ءِ
وتی گُلزمین بھشتیں  مئے راج پرچا جَٹ اِنت

آ کئے ءَ کہ پہ وتن  مُرت  وتی  نام دپترے کُت
اِے کئے کہ زر  دوستیں  اِے لگور باز ھِٹ اِنت

کدی بُلبُلانی    نالگ  کدی   پُل ءِ ناز ءُ ھَندگ
منی باگ پُل گاریں منی کار شوھاز ءُ پَٹ اِنت

منی چَمّ  چِراگ  زاریں  منی اِشک بے تواریں
مہ کَن اِشک گِلگ ءَ رند  کہ اِشک راه گَٹ اِنت

رند بلوچ