درد ءُ درمان
درد کَیت بے مِنت ءَ درمان نئیت
بید تئی درداں دِگہ درد مان نئیت
یاتگاراں درد تئی زیمیں دِل ءَ
گرانیں درداں دِل منی ارزان نئیت
مُرتگیں زِند ءَ منی زِندے بدے
بے ترا زِند ءَ منی گاں جان نئیت
جُنزگاے شپ منی لُنٹاں گوں تئی
بے ترا سُھب ءِ سیمن آسان نئیت
چوں مہ رنجین مِھربانیں ھمبلاں
ھمبل ءِ کہ سِست پہ اومان نئیت
زِندے ھَر راہ ءِ سرا مَرگ اِنت بَچار
گْوستگیں اُمر اوں پَدا کِنزان نئیت
بیا جوانی ءَ وتی تاوان مَکن
اِے جوانی روت پہ اَرمان نئیت
رند وتی اَرسانی کَدر ءَ واں بِزان
گْورتگیں اَرس پہ ترا شَنزان نئیت
✍ رند بلوچ
