گُلزمین ءِ پُسّگ

  کُشتگیں  بَچانی  داگ ءَ   چہ ماساں جَست کَن

  سُتگگیں  باگانی  ھال ءَ   چہ یاساں جُست کَن

  تو کہ پہ  وشیں   کلاتاں  نِشتگ ءِ سَر پد نہ ئَے

  زھریں  تیرانی  نِشان ءَ   سرمچاراں جُست کَن

  تو مَسیت ءَ    کپتگ ءِ   گوں    ھُدا  آں  ھلوت ءِ

  سُتگگیں  لوگاں  بلوچ ءِ   چہ   آساں جُست کَن

  تو پہ مُلا  دیم  دئے   گوشت ءُ  پَس ءَ نام ءِ ھُدا

  یک برے  نام  ھُدا  شُد لاپیں برساں جُست کَن

  وش ءُ آسودگ  وتی   زالانی   بگلاں  واب اِت ءَ

  سرمچار ءِ پاسپانی ءَ  شپ ءِ پاساں جُست کَن

  مَرد پہ  ماتیں  وتن  ساہ آں  وتیگاں  سَرگْوز اَنت

  گُلزمین ءِ  پُسگانی  بیا   اِے  لاشاں  جُست کَن

  تو گوں  شیراں  جان شود  مُلا  منی  واجہ منی

  پِٹے آپ ءَ تلوسی راج ھُشکیں تاساں جُست کَن

  ھانُل ءِ   چّم ءَ    شرابی     رند    بزگ بے وتیں

  ھِچ  ترا  باور  نہ  کَنت  آسکی چّماں جُست کَن

  ✍️ رند بلوچ