دیستگ اَت
من پرندوشیگیں واب ءَ ملگزارے دیستگ اَت
ملگزارے دامن ءَ باگی اَنارے دیستگ اَت
من نہ زاناں کہ کئی بھت ءُ نسیب ءَ جَھ جتگ
زی گمانی کاروان ءِ من کتارے دیستگ اَت
ھمر ھال چہ سِستگیں مردانی رنگ ءَ بے وسیں
کاروان ءِ دنز ءِ دیم ءَ من گُبارے دیستگ اَت
دست بنداں کہ وتی ٹھلانی لَھڑاں کم بکن
کہ پَمے راہ ءَ من چکّپر وشیں تلارے دیستگ اَت
دُژمنے زاناں پہ لال ءِ ھاتر ءَ پیداک کتگ
دوشی واب ءَ بے دَمیں یک سیْاہ مارے دیستگ اَت
کم نہ بیت بے ساری گَھگریں سر ءُ موجیں دل ءِ
من نہ زاناں اِمبری چونیں بھارے دیستگ اَت
رَد چُشیں نہ وراں سید من دُمبر ءَ، یات اِنت من ءَ
گُڈّ چہ شش ماہ ءَ من ھانُل پہ گِدارے دیستگ اَت
سَید ظهور شاه هاشمی
برتکگیں بیر
