کُجا بوت اَنت ھَما پُرّ مھریں دیوان
کہ یکجاہ نند ءُ نیاد اَت گپّ ءُ تران
نہ ھَست اَت کینگ ءُ کَست ءُ ھَسدئے
گوں پَہکیں دِل مُدام وَژدِل ءُ شادان
تِپاکی مهر ءُ دوستی هَمدلی اَت
پہ گِند ءُ گِندُکی ءَ سْیاد ءِ اومان
نہ ھَست اَت جیڑہ ءُ جنگ ءُ پَساتے
کہ برات ءَ برات واستہ ساہ کُربان
میار جَہلّی بلوچ ءِ نام بُرز اَت
یَلیں دودا پہ سَمی بوت بیران
وتی ماتیں زُبان ءَ شَیر ءُ دبگال
کہ زِندگ داشتگ اَت گَنجیں زُبان
شپ ءِ پاس ءَ کہ کُل ءَ نِشتاں یجّاہ
کُت اَنت پیر ءُ کماشاں پَنت درشان
گُلیں ماسانی دست ءِ موش ءُ تِنّیگ
گُشے بھشت ءِ وارک اَت گُژن درمان
کُج اَنت آ مَشک ءُ ھینزک شیر ءُ آپے
کہ گوں نوشگ دِل ءَ رَست تازَگیں جان
بہ پُروشیت مھرے ھوشام ءَ منیگ ءَ
اَمُل پُرمھریں تاس ءُ سارتیں آبدان
پدا آ مھر جَمبَر کد بہ گوار اَنت
پہ مھر ءَ باز تُنیگ اِنت ماتیں مَکُّران
زَیم بلوچ
