چاربند 4

درداں  گوں   دل  مئے پَدرا
روک اِنت چو سُھریں اَنگرا

 

بند اِیت   گَم  چو  جَمبَر ءَ
گْوار ایت  منی  راج ءِ سرا

 

زَیم بلوچ

                                                                                                                                     

اَبیتکیں گِس

گِس اَبیتک ءُ زِند ویران اِنت منی
اُستمان ءِ ناتِپاکی تاوان اِنت منی

 

سوز ءُ اَرمان بَژن نوشاں آچش ءَ
گُلزمین ءِ آجُوئی اَرمان اِنت منی

 

✍زَیم بلوچ

                                                                                                                                     

میراسیں بلوچستان

 

ساہ  ءُ  سر  ندر  اِنت   پہ  ھَنکیں بلوچستان ءَ وتی
پَد  نہ  کِنزاں   اَچ   وتی   گَنجیں  بلوچستان ءَ وتی

 

اِیر   دَیاں    چو    نرمزار  ءَ   ننگ  ءُ  نام  ءِ  ھاتِر ءَ
نہ   کہ   ھَپتاراں    دَیاں    ماتیں  بلوچستان ءَ وتی

 

پَمّن  ءَ  رُژن  اِنت  ءُ  ماہ اِنت  جی  بلوچستان  نام
شپ چو لُنج ءَ من زَراں پہ ماھیں بلوچستان ءَ وتی

 

دُژمناں  چو  پُروشتگ  ءُ  ویران  کُتگ  مئے  گُلزمین
کئے  پہ  وشی  سرگوز اِیت واریں بلوچستان ءَ وتی

 

کس  پہ  نامردی   وتی   میراس  ءُ  مَڈّیاں  نہ  دات
چوں  دَیاں  بُن  پیرُکی  میراسیں  بلوچستان ءَ وتی

 

ھَو وتی  مِسکیں ڈگار کس ءَ  پہ چارَگ شات نہ بیت
یَل  کناں  من  چون  اِے   مِسکیں  بلوچستان ءَ وتی

 

من  گوں   ھُوناں   ھِنّدیاں    میناں  وتن  بانوری  ءَ
سمبئیناں    من     پدا     بانوریں  بلوچستان ءَ وتی

 

جزماں  روچے    آجُوئی   رُژن   دُژمناناں  کور  کَنت
زَیم   بِدے   مِستاگ  پہ   آجُوئیں  بلوچستان ءَ وتی

 

زَیم بلوچ