مُلا ءُ مَلوک

     میر ءُ وتن  دوست  وار باں  مُلا  اگاں سردار باں

     اِے  جَنت ءِ  دُمباں  تَچاں  چہ   گُلزمین بیزار باں

     شیدائے ھور ءُ لِزت ءَ اِشک ءَ بِھشت ءِ بے وتا‎‎ں

     بیگواہ  چہ  جِندءَ   وتی اِے  گوں کیاں گموار باں

     دوزَک  کُتگ  دُنیاں  مئے  گوں جَنت ءِ کُولءَ کرار

     یل داتگیں   ماتیں   وتن   گوں    آزمان ءَ یار باں

     مُلا ءُ مَلوک ءَ   بَچار,   مُلا چوں شاہ مَلوک گَداں

     مَلوک ءِ باگ  ویران  بیت  مُلا  پہ  وت سَربار باں

     روباہی  مَکراں  بَل وتی مَردم نیاں میش ءُ پَس ءِ

     اچ گوں  وتی  مَکر ءُ  پَریپ  پہ  ھاکمی دِلوار باں

     نَسیَت مَکاں  مُلا من ءَ ماتیں وتن مئے جَنت ئے

     اِے  گُلزمین مئے  مَزھب ءِ  پہ سرڈگارءَ شار باں

     درداں  گوں درمان  سازگ ءِ  رند ءَ بچار دِلمانگ ءِ

     پہ دِلبرے  دیداری ءَ   مَدھوش  باں   من گار باں

     رند بلوچ

                                                                                                                                                                                                                                                                                                                                                                

رسم ءُ دود

    ـــــــــــــــــــــــــــــــــــــــــــــــــــــــــــــــــ

     آ بلوچیں کہ  گوں   درامد سانگ کَنت

     نئے بلوچیں   کوم ءِ    نام ءَ ننگ کَنت

 

     هر کس ءَ دوستیں  وتی رسم ءُ رواج

     بے سریں مرد ءَ  کہ  دود ءَ زنگ کَنت

 

     مئے بلوچی  زِندگ ءِ پہ  رسم ءُ دود

     کئے وتی   ماتیں   زُبان ءَ  گُنگ کَنت

 

     بَس وتی   جِند ئے   کلوگر جَنت ئے

     بے سَما  آں  جَنت ءَ    وت تنگ کَنت

 

     یل  بِداں   ڈیھہ ءَ    وتیگاں   دل یلوں

     آ  لگور ئے   کوم ءِ   پاداں   لَنگ کَنت

 

     سر وتی   داتگ  آ    میریں   ھمل ءَ

     ھاتِر ءَ   کوم ءِ     وتاں  را سَنگ کَنت

 

     اچ وتی  شئر ءَ  گوں  من  وازے کناں

     رند ھَما  رند ءِ   کہ  گالاں  چَنگ کَنت

      رند بلوچ