واھگ ءَ زیراں دل ءِ کِنزاں کناں
پہ وتی ھُشکیں ڈگار شنزاں کناں
وپتگیں واب ءَ نہ بیت آجو وتن
ھر سھار ءَ من رواں جنزاں کناں
من چوں شھداد ءَ نباں اِشتاپکار
اُمر ءِ مکراں گوں مھنازاں کناں
تو کَنے جی جان ڈیھہ ءِ دُژمن ءَ
من گوں بیلءُ ھمبلاں رازاں کناں
کئے وپاداریں چو سسی پنوں ئے
گُلزمین ءَ گوں وپا سازاں کناں
دُر زبانیں مئے بلوچی لَبز ءُ گال
شرکنیں گال ءَ وتی لَبزاں کناں
ناں کسے اِے سرڈگار ءَ آپ دات
ناں کہ مُلا گُلزمین وازاں کناں
دل مُدام اومان کَنتیں ھانُل ءِ
رند پدا من ھانُل ءَ نازاں کناں
رند بلوچ
آ گُلرنگ ءَ جّگر سوتک ءُ پُرے کُت
دِل ءِ اُپارگ ءَ دِل اَنگرے کُت
مجَن تھنائی ءِ تُژن ءُ شِگّان ءَ
کجا اِے متلبی بیـلاں بَرے کُت
نہ کُت ماه آں منی شپ روشنائی
گَنوک ءَ من کہ ماہ اوں دِلبرے کُت
منی آرسانی کَدر ءَ گُل بہ زانتے
گُلیں مِسکیں ڈگار ءَ جمبرے کُت
ملام ءُ بے گناہ ءُ بے مّیاراں
چہ مِھرانی شار ءَ بے دَرے کُت
دلوں شُشتَگ مُسلمانی سواب ءَ
من ءَ مُلاے وازاں کاپِرے کُت
دِل درمان منی ماہ ءِ لِکاں اِنت
ترا رند اِے جَنکاں شائرے کُت
رند بلوچ
